Прэзентацыя II Еўрапейскіх гульняў і турніру па баскетболе 3х3, уключанага ў праграму прэстыжнага форуму, адбылася на Генеральнай асамблеі ФІБА-Еўропа, паведамілі карэспандэнту БелТА ў Беларускай федэрацыі баскетбола.
У асамблеі, якая прахо­дзіла ў Мюнхене 24-25 мая, прымалі ўдзел кіраўнікі нацыянальных федэрацый Еўропы, прэзідэнт ФІБА Арасіа Мураторэ, генеральны сакратар ФІБА Андрэас Загкліс. Нашу краіну прадстаўляла дэлегацыя на чале са старшынёй Беларускай федэрацыі баскетбола Максімам ­Рыжанковым.
Генеральны сакратар і выканаўчы дырэктар БФБ Настасся ­Марыніна расказала ўдзельнікам асамблеі аб спаборніцтвах па баскетболе 3х3 у чэрвені ў Мінску, у якіх прымуць удзел 16 мацнейшых мужчынскіх і жаночых каманд. Размова таксама ішла аб інфраструктуры, магчымасцях бязвізавага ўезду ў ­Беларусь і турыстычных пакетах для арганізаваных груп балельшчыкаў.
Свой удзел у II Еўрапейскіх гульнях у якасці госця пацвердзіў выканаўчы дырэктар Міжнароднай федэрацыі баскетбола ў Еўропе Каміль Новак. Чакаецца візіт у Мінск і прэзідэнта ФІБА-Еўропа, выбары якога адбыліся ў Мюнхене, 25 мая.
«Многія кіраўнікі ФІБА і ФІБА-Еўропа, а таксама прадстаўнікі нацыянальных федэрацый ужо шмат разоў наведвалі нашу краіну. Усе яны адзначаюць выдатную арганізацыю мерапрыемстваў, якія праводзяцца ў Беларусі, прыгажосць сталіцы і высокі ўзровень спорту ў краіне пры падтрымцы кіраўніка дзяржавы. У час перагавораў з кіраўнікамі нацыянальных федэрацый дасягнуты дамоўленасці аб падтрымцы ініцыятыў Беларусі па пытаннях правядзення вялікіх спартыўных турніраў у нашай краіне, а таксама ў рэалізацыі сумесных праектаў», — рас­казаў Максім Рыжанкоў.

Источник: